Stop Fosilak elkartea klima aldaketak munduan eta Euskal Herrian dituen ondorioen eta herri bezala daukagun erantzunkizunaren inguruan eztabaida sustatu eta proposamenak gizarteratzeko taldea da, arreta berezia jarriz erregai fosilen arazoan eta trantsizio energetikoan. Larrialdi klimatikoaren testuinguruan, deskarbonizazioa lehentasun sozio-ekologiko handienetarikoa da, eta, erronka horri erantzuten lagundu asmoz, energia berriztagarrien aldeko jarrera sustatuko dugu Euskal Herrian.

Trantsizio energetiko justu eta azkarra nahi dugu, eta, besteak beste, horrekin esan nahi duguna da Pariseko Akordioak zehaztutako epe eta erritmoan egin behar dela, beti ere interes publikoari erantzuten dion lurralde plangintza batek gidatuta, jabetza eredu partekatuei atea irekiz, gizarte sektore zaurgarriak babestuz eta tokiko komunitateen ahotsa aintzat hartua izateko deliberazio prozesuak sustatuz. Stop Fosilak taldeak egin beharreko trantsizio energetikoaren nolakotasunean jarriko du azpimarra, horretarako proposamenak, hitzaldiak edo multimedia edukiak garatuz.

Horrez gain, trantsizio ekosozialaren hari mutur ezberdinen inguruko hausnarketarako espazioa ere bada Stop Fosilak, besteak beste, hazkunde osteko paradigmaren, nahikotasunaren edo bizitza oparoa zer den birpentsatzeko beharraren inguruko eztabaida sustatuz.